Масовната имунизација тече забрзано во Велес – и на пунктот за вакцинација и во домашни услови

115

На Пунктот за масовна имунизација Велес, сместен во спортската сала на ССОУ „Коле Неделковски“ од 25 мај до 13 јули, вакцинирани се вкупно 13.945 граѓани. Од нив 9.531 лица со една и 4.414 со две дози на вакцини „АстраЗенека“, „Синофарм“, „Фајзер“ и „Синовак“. Кај ниту еден од вакцинираните граѓани не се појавија несакани ефекти

Пишува: Убавка Јаневска

Вкупно 137 или 1 отсто од вкупниот број граѓани што веќе се вакцинираа во Велес до 12 јули, годинава, примија вакцина во домашни услови. Два и пол месеци пред да започне теренската имунизација во државата, здравствените работници на Службата за имунизација на Здравствен дом Велес вакцинираа  72 лица со вакцината „Синофарм“ и 65 со „АстраЗенека“. Овие граѓани дома ја примија и втората доза на вакцина. Сите тие имаат 60 и повеќе години, хронични болни се или не можат да се движат. На 31 март, кога во Здравствен дом Велес започна вакцинацијата против „ковид-19“, оваа јавна здравствена установа на Службата за имунизација ѝ стави на располагање медицински возила и возачи.

Лекарите и медицинсите сестри се мобилизираа. Се поделија на тимови составени од лекар и медицинска сестра, во кои учествуваа шест лекари и пет медицински сестри од Службата за превентивна заштита на предшколски деца, двајца лекари и четири медицински сестри на Службата за имунизација, шест лекари стажанти и осум медицински сестри од Патронажната служба. Општината ја поделија на реони за вакцинирање во домашни услови.

Два и пол месеци подоцна, на 12 јули, кога Министерството за здравство официјално соопшти дека на територијата на државата започнува со теренска вакцинација, екипите на велешкиот Здравствен дом, само се прегрупираа. Дел од нив продолжија да вакцинираат во домовите во Велес, додека останатите тргнаа кон населените и руралните места на велешката и општините Чашка, Градско и Лозово.

Еден ден подоцна, на 13 јули, со список во рацете тим од лекарка и медицинска сестра ја започнаа дневната имунизација во Велес. На списокот имаше 13 граѓани за вакцинација во домашни услови. Прв,  беше Абдија Тиквешанец, којшто првата вакцина на  „Синовак“ ја прими во неговиот дом, на ул: „Тодор Абрашев“ во Велес. Седумдесет и четири годишниот Горноврановец, кој живее во Велес, боледува од дијабет и како последица на болеста има 80 отсто оштетен вид, со што спаѓа во ризичната категорија на граѓани од ковид-19. Тој беше вакциниран по земена анамнеза и дадени медицински совети на сè што треба да обрне внимание по добиената вакцина .

Пријатели ме пријавија на vakcinacija.mk а потоа и во Здравствен дом за примање на вакцина во домашни услови. Добро е што пријателите ми завршија работа. Јас не ни знаев дека сум можел да се вакцинирам дома. Затоа и задоцнив со пријавата. Се колебав како ќе стигнам до вакциналните пунктови во Велес. Но, сè добро се заврши. Им благодарам на лекарката и на медицинската сестра. Не ни почувствував кога ме боцнаа. Мора да се вакцинираме, прво за лична безбедност, а потоа да придонесеме и за колективното здравје во државата. Тоа е особено значајно по информациите што секој ден ги слушаме на телевизија дека сега се појави нов, делта сој на вирус, како закана по човештвото, рече Тиквешанец.

По посетата во домот на Тиквешанец, екипата за имунизација, продолжи да ги бара останатите пријавени граѓани во зградите во центарот на градот и во велешката Нова Населба. Дел од граѓаните на списокот живееја и на ридовите со кои е опкружен градот

Лекарката Марина Тодоровска  е дел од Службата за имунизација на велешкиот Здравствен дом. Таа од 31 март годинава секојдневно работи со граѓани што се вакцинираат. Д-р Тодоровска, како координаторка на Пунктот за масовна имунизација во Велес, соопшти дека ниту еден пријавен пациент не остана невакциниран во домашни услови.

Додека вакциниравме само на двата вакцинални пункта во Здравствениот дом, во понеделник започнувавме да ги запишуваме граѓаните,  чии роднини, а понекогаш и пријатели доаѓаа и ни пријавуваа дека на терминот закажан за тој ден лицето не може да дојде. Штом имавме петмина запишани граѓани еден тим излегуваше на терен и ги вакцинираше. Тоа беа претежно граѓани на средна возраст или во поодминати години, со коморбидитети и ризични на заразното заболување. Додека епидемијата на ковид-19 беше во полн ек, тимовите облекуваа скафандери, хаљачи, капи и ставаа заштитни маски и визири за да им излезат во пресрет на сите заинтересирани граѓани за вакцинирање во домашни услови. Сега, од 12 јули, во теренска  имунизација тимовите одат во сите населени места како во велешката, така и во соседните општини Чашка, Лозово и Градско. Сите што сакаат, без разлика дали аплицирале или не на vakcinacija.mk ги вакцинираме, додаде Тодоровска.

Според евиденција на Службата за имунизација во Велес, поголем број на вакцинирани граѓани се на средна возраст и во поодминати години во споредба со помладите лица. Состојбата е таква поради желбата на младите да бидат вакцинираат со вакцината „Фајзер“. И покрај пристигнатите 4.791 дози на овој вид вакцина во Велес, Мој Термин дал можност на мал процент на млади лица, под 30 години, да бидат вакцинирани со неа.

На Пунктот за масовна имунизација Велес, сместен во спортската сала на ССОУ „Коле Неделковски“ од 25 мај до 13 јули, вакцинирани се вкупно 13.945 граѓани. Од нив 9.531 лица со една и 4.414 со две дози на вакцини „АстраЗенека“, „Синофарм“, „Фајзер“ и „Синовак“.  Кај ниту еден од вакцинираните граѓани не се појавија несакани ефекти.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.