Дац и Александар: Голем предизвик е настапот во светски локал како Де Факто, пред публика што знае што е добро !

454

Дац и Александар митевски ќе настапат оваа сабота, на 12 септември во Nightclub & lounge bar De Facto Riverside Гевгелија, секако под строги заштитни протоколи. Ова дуо донесе една зрелост во музиката на македонската сцена, а нивните хитови брзо се намножија.За време на карантинот и интензивниот полициски час Дац, Александар и бројни нивни пријатели направија шарено дефиле од онлајн песни и гости, со што драстично се разубавуваа затворените денови.Од таму излезе и сатиричната преработка на Ciao Bella, во нивна верзија „Корона Чао“. Маркетинг тимот на De Facto RIverside направи краток разговор со дуото, кој може да го прочитате во продолжение.

Како иницијално се случи спојката Дац и Александар?

Дац: Ние двајца сме пријатели долго време, не спојуваше и работата во одредени периоди од животот ( го држевме најпопуларниот кафиќ “Мајка ти и татко ти”) снимавме и заеднички работи за радио и тв реклами. Дуото се појави кога Копров ни предложи да се појавиме двајцата на “Охрид фест” минатата година. Еден еминентен актер и еден од најуспешните музичари не можат да не донесат свежина во музичката сцена, рече Копров, а ние го послушавме и ја почнавме приказната со дуото.

Александар: Мислам и дека и публиката е најзаслужна за оваа спојка. Јас немав своја авторска песна долги години, никогаш немаше да помислам повторно да пеам на фестивал или слично. Дац е тој кој ме повлече да направиме нешто заедно и публиката го одобри тоа со симпатии уште од првиот ден. Кај народот имаше потреба од убави текстови, љубов, носталгија, романтика и некој да ги потсети на вредности кои ги забораваме во ова темпо на животот.

Раскажете ни сеќавањa од гевгелиски приказни..

Заедно: Конкретно не ни текнуваат во моментов некои анегдоти и случки, но Гевгелија е топол град, со убави широки луѓе  кои го сакаат животот, забавата, сакаат убава музика, храна.. И секогаш ни е драго кога ќе добиеме покана од овој крај, затоа што тука луѓето поинаку го дишат животот, сакаат предизвици и знаат да оценат што е добро.

Кој дел Ви е омилен, а кој непријатен од „новото нормално“?

Дац: Во ова време-невреме најубавиот дел е дека природата се обнови и нашата земја ни покажа што нејзе и пречи, а што и годи. Најлошото е што не можеме да се изгушкаме со милите ни луѓе.

Александар: За време на карантинот стекнавме многу пријатели, знајни и незнајни. Направивме акција од 60-тина дена непрекинато јавување со песна навечер кога на сите им беше тешко, стресно и депресивно. Тоа е нашата најсакана придобивка на ова ново време, а секако тешко ни паѓа што не можеме да имаме контакт со публиката како во нормални услови.

Скоро 7.000.000 прегледи на песните на YouTube, за едвај една година постоење на каналот. Вашата музика е маестрален преплет од чалгија, поп и етно тонови и различни јазици. Дали нејзината зрелост е потпис на Вашите индивидуални професионални „километражи“ или имаат и друг извор тие прекрасни дела?

Дац: Нашиот багаж што го носиме позади нас, како успешни луѓе во нашите професии е причината за успехот на дуото. Не може никој од нас да пројде преку нешто ако не му се допаѓа, ја знаеме публиката многу добро, зашто целиот живот работиме со неа и за неа. Двајцата сме позитивни личности, а публиката тоа го чувствува.

Александар: Едноставно нашиот бекграунд и широките познанства кои ги имаме, нашата креативност и актуелност направи побрзо да стигнеме до срцата на луѓето. Ние нашата публика секојдневно ја негуваме, со убав збор, со убава песна, со внимание.. За нас успесите не се само бројки, туку си имаме своја мисија – да шириме љубов.

Вашите чувства и пораки за концертот во De facto Riverside.

Заедно: За нас е голем предизвик за првпат како дуо да се претставиме на гевгелиската публика која ќе биде генерациски шарена. Се радуваме на средбата со гевгелиската публика во Дефакто, посебно затоа што се работи за светски направен локал, па така ветуваме одлична забава и ќе раскажеме една поинаква приказна. Секој наш настап е нова претстава. Би сакале да им порачаме на гостите да ги следат протоколите за заштита и да бидат дисциплинирани. Ве сакаат Дац и Александар.

(комерцијална објава)

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.